ត្រូវពិចារណាចំណុចសំខាន់ៗទាំងនេះសិន មុនសម្រេចចិត្តខ្ចីបំណុលគេ ដើម្បីកុំឲ្យមានបញ្ហាថ្ងៃក្រោយ
ការជំពាក់បំណុលគេ គឺជារឿងជៀសមិនផុត ជាពិសេសអ្នកដែលត្រូវការយកលុយដើម្បីដោះស្រាយបញ្ហា បន្ទាន់ និង ការពង្រីកអាជីវកម្មជាដើម។ ប៉ុន្តែយ៉ាងណាក៏ដោយ ពាក្យថាបំណុលនេះ នឹងធ្វើឲ្យអ្នកជួបបញ្ហាធ្ងន់ធ្ងរ ប្រសិនបើមិនចេះប្រើវាឲ្យបានត្រឹមត្រូវ និង គ្មានវិធីក្នុងការសងបំណុលគេវិញ។ ដូច្នេះហើយ មុនពេលសម្រេចចិត្ត ខ្ចីបំណុលគេ អ្នកត្រូវគិតឲ្យបានច្បាស់សិន៖
១) គោលបំណង៖ បើអ្នកពិតជាត្រូវការលុយបន្ទាន់ ដើម្បីយកទៅដោះស្រាយបញ្ហាមែននោះ មិនអីទេប៉ុន្តែបើខ្ចីលុយមកគ្រាន់តែចាយប្រចាំថ្ងៃ វាជាកំហុសដ៏ធ្ងន់បំផុត។ មនុស្សមួយចំនួននៅតាមទីជនបទដែលគ្មានចំណេះដឹង តែងតែខ្ចីបំណុលធនាគារ ឬ គ្រឹះស្ថានមីក្រូហិរញ្ញវត្ថុផ្សេងៗ ឬ បុគ្គលណាមួយដោយគ្មានគោលដៅច្បាស់លាស់ ពោលគឺគ្រាន់តែដើម្បីទិញម៉ូតូ ឬ វត្ថុផ្សេងៗដែលកូនចង់បានប៉ុណ្ណោះ។ ប្រការនេះហើយ ជាហេតុនាំឲ្យពួកគេបាត់បង់អចលនទ្រព្យ ដូចជា ដី ឬ ផ្ទះជាបន្តបន្ទាប់។
២) ពិនិត្យមើលអត្រាការប្រាក់៖ មុនសម្រេចចិត្តខ្ចីលុយពីកន្លែងណាមួយ អ្នកត្រូវពិនិត្យឲ្យបានច្បាស់ អំពីអត្រាការប្រាក់ ព្រោះថាបើអត្រាការប្រាក់ខ្ពស់ពេកនោះ ប្រៀបដូចជាយកខ្សែមករឹតកខ្លួនឯង ដោយហេតុថា គ្មានលទ្ធភាពគ្រប់គ្រាន់ក្នុងការសងទៅវិញ។ ដូច្នេះហើយ អ្នកត្រូវតែថ្លឹងថ្លែងឲ្យបានច្បាស់។
៣) សងដោយរបៀបណា៖ មនុស្សមួយចំនួន ភ្លេចគិតថា ខ្លួនត្រូវសងបំណុលគេដោយរបៀបណា ក្រោយពេលខ្ចីលុយគេរួចមក។ ក្នុងន័យនេះ អ្នកត្រូវប្រាកដថា ប្រាក់ខែ ឬ ចំណូលអាជីវកម្មរបស់អ្នកគឺមានសក្ដានុពលគ្រប់គ្រាន់ក្នុងការសងបំណុលឲ្យគេវិញ ទៅតាមពេលកំណត់។
៤) ពិនិត្យមើលកិច្ចសន្យាច្បាស់លាស់៖ ដើម្បីប្រាកដថា ការជំពាក់បំណុលរបស់អ្នកនឹងមិនបង្កបញ្ហាស្មុគស្មាញទៅថ្ងៃក្រោយ អ្នកត្រូវតែមានកិច្ចសន្យាមួយដែលច្បាស់លាស់ ដែលភាគីទាំងសងខាងបានព្រមព្រៀងគ្នា។ កិច្ចសន្យាពិតជាសំខាន់ខ្លាំងណាស់ ព្រោះដើម្បីជៀសវាងការបន្លំ ឬ បោកប្រាស់ផ្សេងៗ ដែលនាំឲ្យខាតបង់ធ្ងន់ធ្ងរ។ នៅតាមទីជនបទ បញ្ហាជាច្រើនបានកើតមាន ជាពិសេសការខ្ចីបំណុលរវាងបុគ្គល និង បុគ្គល ដូច្នេះហើយគួរប្រុងប្រយ័ត្នចំពោះប្រការនេះ៕
ដោយ៖ អ៊ុន ភក្តី
ប្រភព៖ www.telegraph.co.uk, www.caab.org & www.moneyhabits.com
