ស្វែងយល់អំពីទស្សនវិស័យសេដ្ឋកិច្ចកម្ពុជា ឆ្នាំ២០១៨
នៅថ្ងៃទី ០៨ ខែឧសភា ឆ្នាំ២០១៧ អគ្គនាយកដ្ឋានគោលនយោបាយសេដ្ឋកិច្ច និង ហិរញ្ញវត្ថុសាធារណៈ នៃក្រសួងសេដ្ឋកិច្ច និង ហិរញ្ញវត្ថុ បានចេញផ្សាយនូវរបាយការណ៍នៃការវាយតម្លៃបឋមនៃសេដ្ឋកិច្ចកម្ពុជា ដែលមានចំណងជើងថា “ស្ថានភាពសេដ្ឋកិច្ចកម្ពុជានាពេលបច្ចុប្បន្ននិងទស្សនវិស័យឆ្នាំ ២០១៨”។ នៅក្នុងអត្ថបទនេះ លោកអ្នកនឹងបានស្វែងយល់អំពី តើកម្ពុជាមានទស្សនវិស័យសេដ្ឋកិច្ចអ្វីខ្លះក្នុងឆ្នាំ ២០១៨?
ជាការពិតណាស់ ស្ថានភាពម៉ាក្រូសេដ្ឋកិច្ច និង ហិរញ្ញវត្ថុ នឹងបន្តរក្សាស្ថិរភាពល្អ ស្របពេលដែលកំណើន ផលិតផលក្នុងស្រុកសរុប (ផសស ឬ GDP) នឹងអាចសម្រេចបាននូវក្នុងរង្វង់ ៧% ខណៈអតិផរណាស្ថិតនៅ ក្នុងកម្រិតក្រោម ៥%។ លទ្ធផលនេះគឺទទួលបានពីការវាយតម្លៃបឋមទៅលើវិស័យចំនួនបីជាចម្បង មានដូចជា៖ វិស័យកសិកម្ម វិស័យឧស្សាហកម្ម និង វិស័យសេវាកម្ម។
១. វិស័យកសិកម្ម
វិស័យកសិកម្មអាចនឹងសម្រេចបានកំណើនប្រមាណ ១,៩៧% (២០១៧ព្យ.) និង ១,៩៩% (២០១៨ព្យ.) ដោយសារកត្តាអាកាសធាតុអំណោយផល និង ការបង្កើនចំណាយរបស់រាជរដ្ឋាភិបាលដើម្បីគាំទ្រ ដល់វិស័យនេះ។ កំណើននេះអាចសម្រេចបានលុះត្រាតែមានការបង្កើនប្រសិទ្ធិភាពក្នុងការចំណាយ ការជំរុញការ វិនិយោគឯកជន ការសហការល្អជាមួយដៃគូអភិវឌ្ឍន៍ និង ការអនុវត្តប្រកបដោយប្រសិទ្ធិភាពនៃគោលនយោបាយ អភិវឌ្ឍន៍វិស័យកសិកម្មរបស់ក្រសួងកសិកម្ម រុក្ខាប្រមាញ់ និង នេសាទ។
២. វិស័យឧស្សាហកម្ម
វិស័យឧស្សាហកម្មអាចនឹងមានកំណើនថមថយបន្តិចបន្តួចប្រមាណ ១០,៦៦% (២០១៧ព្យ.) និង ១០,១១% (២០១៨ព្យ.) ដោយសារតែព្រឹត្តិការណ៍បោះឆ្នោតសកលដែលធ្វើឱ្យវិនិយោគិនមានការស្ទាក់ស្ទើរក្នុង ការវិនិយោគ និងការថមថយនៃសេដ្ឋកិច្ចប្រទេសដែលជាដៃគូពាណិជ្ជកម្មរបស់កម្ពុជា ប៉ុន្តែនឹងត្រូវជួយបំពេញ បន្ថែម ដោយកំណើនផលិតកម្មក្នុងស្រុក។ ដើម្បីសម្រេចបានកំណើននៃផលិតកម្មក្នុងស្រុកនេះ ទាមទារឱ្យមានការ ជំរុញការអនុវត្តគោលនយោបាយអភិវឌ្ឍន៍វិស័យឧស្សាហកម្មឱ្យកាន់តែសកម្ម និង ប្រកបដោយប្រសិទ្ធិភាពជាមុន ដើម្បីបង្កើនភាពប្រកួតប្រជែងរបស់កម្ពុជា។
៣. វិស័យសេវាកម្ម
វិស័យសេវាកម្មអាចនឹងមានកំណើនប្រមាណ ៦,៥៣% (២០១៧ព្យ.) និង ៦,៦៦% (២០១៨ព្យ.) ដោយសារការបន្តថមថយនៃវិស័យអចលនទ្រព្យ ប៉ុន្តែអាចនឹងជួយបំពេញបន្ថែមបានខ្លះដោយភាពរឹងមាំនៃ កំណើនវិស័យលក់ដុំ និង លក់រាយ និងអនុវិស័យសេវាកម្មផ្សេងទៀត កំណើនចំណាយប្រើប្រាស់កំឡុងពេលបោះ ឆ្នោតសកល រួមផ្សំនឹងគោលនយោបាយវិត្ថារកម្មរបស់រាជរដ្ឋាភិបាល៕
ដោយ៖ ប៉ុម ទូច
