គន្លឹះ៤យ៉ាងសម្រាប់គ្រូទើបតែបង្រៀនថ្មីថ្មោង
ជាការពិតណាស់ ការចុះទៅបង្រៀននរណាម្នាក់មិនមែនជារឿងងាយស្រួលនោះទេ។ វារឹតតែពិបាកមួយកម្រិតទៀតនៅពេលដែលអ្នកត្រូវចុះបង្រៀនថ្នាក់មួយដែលមានសិស្សដល់ទៅ២០ឬ៣០នាក់។ លើសពីនេះទៅទៀត ប្រសិនជាអ្នកទើបតែចុះបង្រៀនលើកទីមួយទៀតនោះ ការមានសម្ពាធនិងភាពភ័យខ្លាចគឺជារឿងដែលជៀសមិនផុតឡើយ។ តែ សូមកុំបារម្ភអី គន្លឹះខាងក្រោមនេះនឹងជួយអ្នកបាន៖
១) ស្វែងរកដំបូន្មានពីគ្រូដទៃ៖ គន្លឹះមួយដ៏សាមញ្ញតែមានប្រសិទ្ធភាពដើម្បីក្លាយខ្លួនជាគ្រូល្អម្នាក់គឺស្វែងរកដំបូន្មាន ឬគន្លឹះពីគ្រូដែលមានបទពិសោធន៍យូរឆ្នាំ ពីព្រោះថាពួកគាត់មិនត្រឹមតែអាចផ្តល់គន្លឹះជាក់ស្តែងដែលអ្នកអាចអនុវត្តក្នុងការងារនោះទេ ថែមទាំងអាចបង្កើនទំនុកចិត្តក្នុងការបង្រៀនទៀតផង។
២) អត់ទ្រាំនឹងឥរិយាបថអាក្រក់របស់សិស្ស៖ ជាការពិតណាស់ ជីវិតជាគ្រូបង្រៀនតែងតែពោរពេញទៅដោយអារម្មណ៍គ្រប់បែបយ៉ាងទាំងខឹង ទាំងមួម៉ៅ ទាំងអន់ចិត្ត។ល។ ហើយការរៀនអត់ទ្រាំនឹងអារម្មណ៍ទាំងនោះអាចជាឧបសគ្គមួយផងដែរសម្រាប់គ្រូថ្មីថ្មោង។ ប៉ុន្តែ ប្រសិនជាអ្នកអាចជម្នះនូវបញ្ហានេះបាន ជីវិតជាគ្រូបង្រៀនរបស់អ្នកនឹងល្អប្រសើរជាពុំខាន។
៣) ទ្រឹស្ដីនិងការអនុវត្តផ្ទាល់៖ ប្រាកដណាស់ថា ក្នុងនាមជាគ្រូបង្រៀនថ្មីថ្មោង យើងតែងតែប្រាថ្នាចង់ឲ្យសិស្សធ្វើនូវអ្វីដែលយើងបានរៀបចំសម្រាប់ថ្នាក់។ ប៉ុន្តែ ប្រសិនជាពួកគាត់ទំនេរពេកឬធុញទ្រាន់នោះ ពួកគេនឹងមិនមានអារម្មណ៍ក្នុងការរៀននោះទេ។ ដូច្នេះហើយ ត្រូវរក្សាគម្លាតរវាងទ្រឹស្ដីនិងការអនុវត្តផ្ទាល់ កុំឲ្យសិស្សធុញ។ អ្នកមិនអាចនិយាយពេលមួយម៉ោងឬកូនសិស្សគិតតែអង្គុយធ្វើលំហាត់នោះទេ។ យុទ្ធសាស្ត្រល្អក្នុងការបង្រៀនគឺត្រូវមានទ្រឹស្ដីនិងការអនុវត្តជាក់ស្តែងរួមគ្នា។
៤) រៀនពីកំហុស៖ ជារឿងដែលជៀសមិនផុតនោះទេ អ្នកនឹងមានកំហុសជាច្រើននៅពេលចាប់ផ្តើមបង្រៀនលើកទីមួយ។ ប៉ុន្តែ ចូរចងចាំថាអ្នកកំពុងស្ថិតនៅការអភិវឌ្ឍន៍។ កុំខ្លាចក្នុងការប្រព្រឹត្តកំហុសណាមួយ។ ផ្ទុយទៅវិញ ការបង្រៀនរបស់អ្នកនឹងល្អប្រសើររាល់ពេលដែលអ្នករៀននិងកែប្រែកំហុសរបស់អ្នក៕
ប្រែសម្រួល៖ អុឹង មុយយូ ប្រភព៖ impactteachers.com
