ហេតុអ្វីសម្បូរតែស្ត្រីដែលរៀនផ្នែកពាក់ព័ន្ធនឹងសង្គម ប៉ុន្តែស្ត្រីរៀនផ្នែកវិទ្យាសាស្ត្រមានតិចតួចម្ល៉េះ ?
ហេតុអ្វីក៏មានស្ត្រីភាគច្រើនបញ្ចប់ការសិក្សាជាមួយសញ្ញាប័ត្រផ្នែកគ្រប់គ្រង ឬធនាគារ ឬអក្សរសាស្ត្រ ឬផ្នែកដែលពាក់ព័ន្ធកិច្ចការសង្គម ប៉ុន្តែហេតុអ្វីមានស្ត្រីតិចម្ល៉េះដែលមានសញ្ញាប័ត្រផ្នែកគណិតវិទ្យា រូបវិទ្យា ឬវិស្វកម្ម ឬព័ត៌មានវិទ្យា ឬមុខវិជ្ជាSTEM (វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា) ?
នៅក្នុងច្បាប់ បុរសនិងស្ត្រីមានសិទ្ធិស្មើគ្នា ប៉ុន្តែបើងាកមកមើលការអនុវត្តជាក់ស្ដែង នៅក្នុងសង្គមទូទាំងពិភពលោកនេះ អំណាចនិងឥទ្ធិពលរបស់បុរសបានគ្របដណ្ដប់ទៅលើស្ត្រី។ ផ្នត់គំនិតសង្គមដ៏អន់ថយនិងចាស់បុរាណមួយនេះ អាចបកស្រាយចម្លើយគ្រប់បែបយ៉ាងបានថាមូលហេតុអ្វីស្ត្រីចូលរួមក្នុងផ្នែកSTEMមានតិចតួចម្ល៉េះ។ ស្ត្រីនៅពេលត្រូវបានគេប្រាប់ថា ពួកគេនឹងធ្វើមិនបានល្អនៅក្នុងការប្រឡងគណិតវិទ្យានោះទេ នោះលទ្ធផលនឹងប្រែទៅជាអាក្រក់។ ដោយឡែក នៅពេលពួកគេទទួលបានការលើកទឹកចិត្តថាពួកគេនឹងធ្វើបានល្អ នោះមនុស្សទាំងពីរភេទនេះធ្វើបានល្អដូចគ្នា។ បើទោះជាការមិនលើកទឹកចិត្តឲ្យក្មេងស្រីចូលរៀនសាលាបានខ្ពង់ខ្ពស់ដូចក្មេងប្រុស គឺជាទំនៀមទម្លាប់ដែលចាស់បុរាណប្រកាន់ខ្ជាប់និងអនុវត្តតៗគ្នាមកក៏ដោយ ក៏ក្នុងសម័យបច្ចេកវិទ្យាទំនើបនៃសតវត្សទី២១នេះ ផ្នត់គំនិតមួយនេះនៅតែដក់ជាប់យ៉ាងក្រាស់ក្រែលនៅក្នុងសង្គមដដែល។
សង្គមគ្រួសារដែលមិនលើកទឹកចិត្តក្មេងស្រីឲ្យចេះដឹងផ្នែកSTEM ដែលជាបេះដូងដ៏សំខាន់ក្នុងការអភិវឌ្ឍប្រទេសជាតិឲ្យជឿនលឿនបាន ដោយយល់ថាស្ត្រីនឹងមិនធ្វើបានល្អដូចបុរសនោះឡើយ។ គ្រួសារនឹងជំរុញឲ្យពួកគេរៀនអ្វីដែលយល់ថាស័ក្ដិសមសម្រាប់ស្ត្រីគួរចេះ មិនមែនអ្វីដែលពួកគេចង់ចេះនោះឡើយ។ ចូលមកដល់បរិយាកាសសង្គម ភាពលម្អៀងនិងការរើសអើងនៅកន្លែងការងារធ្វើឲ្យស្ត្រីទទួលបានកម្រៃតិចជាងបុរសដែលមានសមត្ថភាពប្រហាក់ប្រហែលគ្នា ក៏មិនខុសគ្នាពីឱកាសនិងរង្វាន់លើកទឹកចិត្តដែលទទួលបានតិចជាងបុរសដែរ។ សមត្ថភាពពិតប្រាកដនិងប្រាជ្ញាពុំមែនអាស្រ័យទៅលើភេទនោះទេ ដោយទទួលបានការលើកទឹកចិត្តត្រឹមត្រូវ ស្ត្រីគង់តែអាចធ្វើបានល្អដូចបុរស។ ប្រទេសមួយអាចអភិវឌ្ឍជឿនលឿនបាន មុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា គឺជាចំណេះដឹងដ៏ចាំបាច់បំផុត ដែលត្រូវការការចូលរួមទាំងពីបុរសនិងស្ត្រី៕
ដោយ៖ ស្រីពៅ
