ហេតុអ្វីខ្យល់អាចប្រើប្រាស់ជាថាមពលអគ្គិសនីកកើតឡើងវិញបាន ?
អ្វីៗទាំងអស់នៅលើពិភពលោកសុទ្ធតែប្រើប្រាស់ថាមពល សូម្បីតែក្នុងខណៈនេះដែលអ្នកកំពុងគិតពីថាមពល ក៏ប្រើប្រាស់ថាមពលដែរ។
ថាមពលត្រូវបានបែងចែកជាពីរផ្នែកធំៗគឺ potential energy និង kinetic energy។ potential energy គឺជាថាមពលដែលអាចយកទៅប្រើប្រាស់ជាប្រយោជន៍នៅពេលក្រោយទៀតបាន។
រីឯ kinetic energy ដែលមកពីពាក្យ kineticដែលមានន័យថាចលនា គឺជាថាមពលដែលកើតមានឡើងដោយសារមានចលនា ឬមានន័យថានៅពេលថាមពលដែលត្រូវបានស្តុកទុក អាចធ្វើឲ្យអ្វីមួយមានចលនាបាន។ នេះហើយគឺជាគំនិតដែលវាយោអគ្គិសនី (wind power) អាចដំណើរការណ៍ផលិតថាមពលអគ្គិសនីបាន។
វាយោអគ្គិសនីមានស្លាបតួប៊ីន ដែលជាទូទៅផ្គុំឡើងដោយស្លាបចំនួន៣ដែលមានទំហំធំ រូបរាងកោង និងទ្រទ្រង់ដោយចំណុចកណ្ដាលមួយ។ នៅពេលខ្យល់មានចលនាបក់មកប៉ះនឹងស្លាបតួប៊ីន វានឹងបាត់បង់ kinetic energy របស់វា។ តួនាទីរបស់ស្លាបតួប៊ីននឹងស្រូបយកថាមពលពីខ្យល់ បើកាលណាស្លាបកាន់តែធំ ហើយរួមនឹងល្បឿនខ្យល់មានកាន់តែខ្លាំងដែរនោះ ថាមពលអគ្គិសនីក៏នឹងផលិតបានច្រើនដូចគ្នាដែរ។ គេក៏ត្រូវសាងសង់ម៉ាស៊ីនតួប៊ីនឲ្យខ្ពស់ផុតពីដីផងដែរ ព្រោះខ្យល់នឹងមានកាន់តែច្រើន ហើយល្បឿនរបស់វាក៏លឿននៅក្នុងរយៈកម្ពស់ខ្ពស់។ ដើម្បីអាចបម្លែង kinetic energy ដែលទាញយកពីខ្យល់ទៅជាថាមពលអគ្គិសនីដែលអាចប្រើប្រាស់បាន គេត្រូវភ្ជាប់ចំណុចកណ្ដាលដែលទ្រទ្រង់ស្លាបរបស់តួប៊ីនទៅនឹងម៉ាស៊ីនរ៉ូទ័រមួយនៅខាងក្នុងតួម៉ាស៊ីនតួប៊ីនជាមួយគ្នានេះ ដែលមានឌីណាម៉ូ ជាឧបករណ៍សម្រាប់បម្លែងជាថាមពលអគ្គិសនី។ ចលនាដែលទទួលបានពីខ្យល់នឹងទៅបង្វិលរ៉ូទ័ររបស់ម៉ាស៊ីនឲ្យវិល នៅពេលនោះឌីណាម៉ូនឹងបម្លែងវាជាថាមពលអគ្គិសនីសម្រាប់ប្រើប្រាស់បាន៕
ប្រែសម្រួល៖ ស្រីពៅ ប្រភព៖ goldpower & explainthatstuff
