តើអ្នកនឹងបង្រៀនកូនអ្នកយ៉ាងដូចម្ដេចអំពីលុយ ?
សង្គមគ្រួសារគឺជាសាលារៀនដំបូងនិងសំខាន់ជាងគេបង្អស់ក្នុងការតម្រង់ទិសក្មេងៗ។ នៅក្នុងអំឡុងវ័យក្មេងខ្ចីនៅឡើយ មិនថាជាគំរូល្អឬអាក្រក់ ដែលនឹងមានឥទ្ធិពលទៅលើដំណាក់កាលជីវិតរបស់ពួកគេនៅពេលពេញវ័យនោះទេ គឺជាសង្គមគ្រួសារនេះឯងដែលក្មេងៗរៀនសូត្របានច្រើនជាងគេលើសពីសង្គមដទៃ នេះមានន័យថានៅពេលកូនតូចៗរបស់អ្នកនៅមានភាពទន់ជ្រាយទៅលើការយល់ដឹងពីពិភពជុំវិញពួកគេនេះ ការបង្រៀនពីអ្នកក្នុងនាមជាឪពុកម្ដាយ អាចមានឥទ្ធិពលខ្លាំងក្លាទៅលើផ្នត់គំនិតកូនៗរបស់អ្នកនៅពេលអនាគត។ តួយ៉ាងចំណេះដឹងអំពីលុយគឺជាការយល់ដឹងដ៏សំខាន់បំផុតទៅលើជោគវាសនានៃជីវិតរបស់កូនៗអ្នកពេលពេញវ័យ។ មិនមែនដោយសារតែពួកគេនៅជាក្មេងតូចនៅឡើយទើបបានជាអ្នកមិនទាន់សម្រេចចិត្តគិតគូរបង្រៀនពួកគេឲ្យដឹងថា តើលុយអាចរកបានដោយរបៀបណា ពួកគេត្រូវចេះសន្សំដូចម្ដេច ចែករំលែកទៅអ្នកដទៃដូចម្ដេចនោះទេ។ គឺដោយសារតែពួកគេនៅក្មេងនេះហើយទើបវាកាន់តែចាំបាច់ឲ្យអ្នកតម្រែតម្រង់ពួកគេពីពេលនេះឲ្យហើយ ព្រោះបើកាលណាក្មេងៗទាំងនេះលូតលាស់ធំទៅ វានឹងកាន់តែពិបាកក្នុងការពត់តម្រង់ទិសដៅពួកគេនូវអ្វីដែលអ្នកយល់ថាត្រឹមត្រូវតែយឺតពេលសម្រាប់ពួកគេណាស់។ ដូច្នេះតើការបង្រៀនរបៀបណាទើបអាចតម្រង់កូនអ្នកឲ្យទទួលបានចំណេះដឹងអំពីលុយនៅក្នុងទិសដៅត្រឹមត្រូវនិងជោគជ័យបាន ?
១) បង្រៀនថាតើលុយរកបានដោយរបៀបណា ? ៖ ទោះបីអ្នកមានលុយច្រើនដែលអាចបន្សល់ទុកជាមរតកសម្រាប់កូនៗអ្នកក៏ដោយ ប៉ុន្តែពួកគេមិនអាចពឹងផ្អែកទៅលើអ្នកពេញមួយជីវិតបាននោះឡើយ។ ពួកគេមិនអាចបើកភ្នែកមកចាំតែលាដៃសុំលុយពីឪពុកម្ដាយពួកគេ ដោយមិនដែលដឹងសោះថាតើលុយដែលពួកគេកំពុងចាយវាយយ៉ាងខ្ជះខ្ជាយនេះ រកបានដោយលំបាកយ៉ាងដូចម្ដេចនោះទេ។ ដូច្នេះ អ្នកគួរតែបង្រៀនពួកគេតាំងតែពីអាយុ៥ឆ្នាំឡើងទៅពីលុយដែលទទួលបានដោយការខិតខំប្រឹងប្រែង និងនៅក្នុងក្រមសីលធម៌ការងារ។ អ្នកអាចធ្វើបែបនេះដោយឲ្យគេធ្វើការងារផ្ទះមួយចំនួន ដោយផ្ដល់រង្វាន់ជាប្រាក់ដល់ពួកគេវិញតបស្នងចំពោះការខិតខំធ្វើការរបស់ពួកគេ។
២) តើលុយដែលទទួលបានមកត្រូវសន្សំវាយ៉ាងដូចម្ដេច ? ៖ អ្នកអាចបង្កើតគណនេយ្យសន្សំប្រាក់សម្រាប់ពួកគេរៀនសន្សំប្រាក់ដែលទទួលបានមក មុននឹងគិតគូរទៅលើការចំណាយ។ បង្រៀនឲ្យពួកគេយល់ពីតម្លៃនៃការសន្សំប្រាក់ ដែលតបស្នងប្រយោជន៍នៅក្នុងរយៈពេលវែងមកឲ្យពួកគេវិញ។
៣) តើពួកគេគួរចាយលុយយ៉ាងដូចម្ដេច ? ៖ នៅពេលពួកគេយល់ពីតម្លៃនៃការសន្សំបន្តិចម្ដងៗ ដែលប្រៀបបាននឹងដំណក់ទឹកដែលតក់ៗគង់តែពេញបំពង់ ពួកគេនឹងចេះគិតគូរថាតើលុយដែលពួកគេខំសន្សំបានមកគួរតែចាយវាយទៅលើអ្វីខ្លះ ចេះបែងចែកដាច់ពីគ្នានូវអ្វីដែលជាតម្រូវការមានប្រយោជន៍ពិតប្រាកដក្នុងរយៈពេលវែង ហើយអ្វីគ្រាន់តែជាការចង់បានក្នុងរយៈពេលខ្លី។ អ្នកអាចនាំគេទៅផ្សារដើម្បីឲ្យពួកគេមើលឃើញផ្ទាល់នឹងភ្នែកថា តើលុយក្រដាសប៉ុន្មានប្ដូរយកអ្វីបានមកវិញ។ បន្ទាប់មកបង្រៀនពួកគេឲ្យចេះចែករំលែកអ្វីដែលខ្លួនមានទៅកាន់មនុស្សនៅក្នុងសហគមន៍ដែលកំពុងតែត្រូវការជំនួយ។ តាមរបៀបនេះ នៅពេលដែលពួកគេជោគជ័យក្លាយជាអ្នកមានហើយ ទោះកំពុងឈរនៅលើទីខ្ពស់ក៏ដោយ ក៏ពួកគេមិនភ្លេចសម្លឹងមើលចុះក្រោមឃើញពីទុក្ខលំបាករបស់អ្នកនៅក្រោមខ្លួននោះដែរ៕
ប្រែសម្រួល៖ ស្រីពៅ ប្រភព៖ businessinsider & huffingtonpost
