ភាពជោគជ័យអាចមិននៅឆ្ងាយពីអ្នកដូចដែលអ្នកគិតនោះឡើយ
ប្រហែលជាមានរឿងតែម្យ៉ាងគត់ ដែលមនុស្សគ្រប់គ្នាចង់ដឹងពីបុគ្គលជោគជ័យនោះគឺ តើពួកគេមានវិធីសាស្ត្ររៀនសូត្រដូចម្ដេច ? តើពួកគេអាចបង្កើនចំណេះដឹងរបស់ខ្លួនឲ្យមកដល់ចំណុចកំពូលខ្ពស់មួយតាមរបៀបណា ? ចម្លើយក៏ប្រហែលជាយ៉ាងសាមញ្ញបំផុតនិងមានតែមួយដូចគ្នានោះគឺ បុគ្គលជោគជ័យជឿជាក់លើខ្លួនឯង ជឿថាពួកគេនឹងជោគជ័យ ពួកគេនឹងអាចធ្វើនូវអ្វីដែលអ្នកដទៃរួមទាំងពួកគេខ្លួនឯងធ្លាប់គិតមកលើខ្លួនឯងថាមិនអាចទៅរួចសោះឡើយ។
ជឿជាក់យ៉ាងដូចម្ដេច ? ជឿជាក់ជាភាពសុទិដ្ឋិនិយម ជាការមើលឃើញអ្វីៗនៅក្នុងផ្លូវវិជ្ជមាន តែពុំមែនវិជ្ជមានបែបជឿជាក់ថាខ្លួនឯងនឹងអាចហោះហើរបាននៅលើអាកាសដូចសត្វស្លាបនោះឡើយ បើមិនដូច្នោះទេអ្នកនឹងបាក់កស្លាប់មិនខាន។ តែជាការជឿជាក់មួយដែលអាចឲ្យអ្នកនៅតែសម្លឹងមើលឃើញអ្វីៗស្ថិតនៅក្នុងដែនកំណត់របស់ខ្លួនឯង កណ្ដាប់ដៃខ្លួនឯង ឬមានតែអ្នកតែម្នាក់គត់ដែលជាម្ចាស់កំណត់លើជោគវាសនាជីវិតរបស់ខ្លួនថាជោគជ័យឬបរាជ័យ។ ជាការជឿជាក់ដែលអាចឲ្យអ្នកច្នៃប្រឌិតនឹកគិតទៅដល់ការបង្កើតយន្តហោះដែលអាចហោះហើរដូចសត្វស្លាបបាននេះឯង។ អ្នកមានកម្លាំងចិត្តនិងថាមពលនិងឆន្ទៈដ៏ពុះកញ្ជ្រោលជឿជាក់បែបនេះបាន លុះត្រាតែវាជាអ្វីដែលអ្នកចង់បានបំផុត អ្វីដែលអ្នកស្រឡាញ់ពេញចិត្តបំផុត ជាកិច្ចការដែលអ្នកភ្លេចបាយទឹកដោយសារតែសេចក្ដីស្រឡាញ់ចង់ធ្វើវាមិនចេះធុញថប់ ឬហត់នឿយកាយនិងចិត្តនេះឯង។ ដូច្នេះហើយទើបបុគ្គលជោគជ័យណាក៏មិនដែលភ្លេចផ្ដល់ដំបូន្មានដល់អ្នកជំនាន់ក្រោយឲ្យរកឲ្យឃើញនូវអ្វីដែលបេះដូងរបស់អ្នកទាមទារចង់បាន អ្វីដែលអ្នកស្រឡាញ់ពិតប្រាកដ ដែលជាគោលដៅឬសំណួរដែលអ្នកត្រូវស្វែងរកចម្លើយនៅក្នុងដំណើរជីវិតរបស់អ្នក។ នៅពេលអ្នករកឃើញអ្វីដែលអ្នកស្រឡាញ់ហើយ អ្នកប្រាកដជាព្យាយាមស្វែងរកវិធីសាស្ត្របែបណាទើបអាចបង្កើនចំណេះដឹងរបស់ខ្លួនក្នុងផ្នែកមួយនោះឲ្យបានស៊ីជម្រៅ។ មនុស្សម្នាក់ៗមានវិធីសាស្ត្ររៀនសូត្រខុសប្លែកពីគ្នា ត្រង់ចំណុចនេះមានតែអ្នកខ្លួនឯងទេដែលស្គាល់ខ្លួនឯងច្បាស់ជាងអ្នកណាៗទាំងអស់។
អ្នកណាក៏អាចក្លាយជាមនុស្សអស្ចារ្យបានដែរ នៅពេលដែលពួកគេរៀនតាមរបៀបដ៏ត្រឹមត្រូវសម្រាប់ពួកគេ។ ប៉ុន្តែបើទោះជាវិធីសាស្ត្ររៀនសូត្រអាចខុសៗគ្នាមែន ការទន្ទេញពុំអាចជាវិធីសាស្ត្រល្អនោះឡើយ ទោះសម្រាប់អ្នកណាក៏ដោយ។ ហេតុអ្វី ? បើមិនទន្ទេញធ្វើម្ដេចអាចចងចាំអ្វីៗបាន មិនថាដូច្នេះឬ ? ពិតមែនហើយ ប៉ុន្តែមុននឹងទន្ទេញ អ្នកត្រូវប្រាកដចិត្តសិនថាអ្នកបានយល់វាជាក់ច្បាស់ហើយ។ ហេតុអ្វីការយល់សំខាន់សម្រាប់ចំណេះដឹង ? បើអ្នកទន្ទេញដោយការងងឹតងងល់ ដោយការមិនយល់ច្បាស់ថាអ្វីដែលអ្នកកំពុងព្យាយាមចងចាំនេះមានអត្ថន័យដូចម្ដេច នោះចំណេះដឹងដែលបានដោយការទន្ទេញនឹងក្លាយជាឥតប្រយោជន៍នៅពេលចុងក្រោយ។ ដោយគ្មានការយល់ច្បាស់លាស់ អ្នកនឹងងាយត្រូវបានគេបោក ហើយបើគេគ្រាន់តែបន្លប់សាកសួរអ្នកចេញពីចំណុចណាផ្សេងបែបប្រយោលវិញ អ្នកប្រាកដជាជាប់គាំងមួយកន្លែង ដោយមិនដឹងឆ្លើយដូចម្ដេចទាំងដែលអ្នកធ្លាប់រៀនវារួចមកហើយ។ យ៉ាងណាមិញ បើអ្នកយល់វាជ្រួតជ្រាបហើយ ទោះគេចង់បន្លប់អ្នកយ៉ាងណាក៏អ្នកនៅតែអាចឆ្លើយបានដែរ ព្រោះអ្នកយល់ពីគោលគំនិតដែលជាឫសគល់របស់វា ប៉ុន្តែវាក៏អាស្រ័យទៅលើថាតើអ្នកចង់ចេះវាខ្លាំងប៉ុណ្ណា ចង់បានចំណេះដឹងនោះប៉ុណ្ណាដែរ។ ទោះជាយ៉ាងណាក៏ដោយ ឧបសគ្គទាំងកើតមានជានិច្ច នៅពេលអ្នកចាប់ផ្ដើមធ្វើអ្វីថ្មី។ អ្នកអាចនឹងជួបនូវអ្វីដែលហួសពីសមត្ថភាពរបស់ខ្លួនឯង ដែលតម្រូវឲ្យអ្នកមានភាពអត់ធ្មត់និងមិនបោះបង់ និងទុកពេលវេលាឲ្យខ្លួនឯងរៀនសូត្រដោយសន្សឹមៗ។
ទោះត្រូវចំណាយពេលយូរប៉ុណ្ណាក៏ដោយ នៅពេលអ្នកមិនខ្វាយខ្វល់អ្វីទាំងអស់ ហើយជឿជាក់តែម្យ៉ាងទៅលើខួរក្បាលរបស់ខ្លួនឯង ថាអ្នកប្រាកដជាអាចឆ្លងហួសរំលងពីដែនកំណត់របស់ខ្លួន ហើយផ្ចង់អារម្មណ៍ធ្វើកិច្ចការរបស់អ្នក នោះអ្នកប្រាកដជាសម្រេចវាបាន។ អ្នកមិនត្រូវឲ្យគំនិតអ្នកដទៃមករំខានអ្នកនោះឡើយ ហើយសូម្បីតែគំនិតមួយដែលមនុស្សភាគច្រើនតែងឲ្យតម្លៃទៅលើការបំពេញការងារច្រើនក្នុងពេលតែមួយក៏ដោយ។ វាមិនអាចទៅរួចនោះឡើយដែលមនុស្សម្នាក់អាចសម្រេចកិច្ចការណាមួយប្រកបដោយគុណភាពខ្ពស់បាន ដោយខួរក្បាលតែមួយរបស់គេដណ្ដើមកិច្ចការងារគ្នាធ្វើនោះ។ ចុងក្រោយការងារទាំងអស់ប្រាកដជាសម្រេចតាមរបៀបនេះ ប៉ុន្តែការងារដែលមានគុណភាពខ្ពស់មិនអាចសម្រេចបានដោយរបៀបនេះឡើយ វាត្រូវការការផ្ចង់អារម្មណ៍ និងការតម្រង់ស្មារតីរបស់អ្នកទៅលើរឿងតែមួយក្នុងពេលតែមួយ។ Henry Ford និយាយថា៖ "បើទោះជាអ្នកគិតថាអ្នកអាចធ្វើវាបានឬក៏មិនអាចក៏ដោយ អ្នកនៅតែត្រូវដូចគ្នា"៕
ដោយ៖ ស្រីពៅ
