សញ្ញាមិនល្អចំពោះទីផ្សារភាគហ៊ុន បន្ទាប់ពីចិនសម្រុកទិញមាស
ក្រុមអ្នកជំនាញផ្នែកសេដ្ឋកិច្ចសកល បានលើកឡើងថា ការទិញមាសរបស់ចិន កំពុងតែធ្វើឱ្យទីផ្សារភាគហ៊ុនមានការរង្គោះរង្គើ។
តាមការចេញផ្សាយរបស់សារព័ត៌មាន Reuters ការនាំចូលមាសសុទ្ធ (net gold imports) របស់ចិនដីគោកពីហុងកុងបានកើនឡើងពី ៥៩,៣តោននៅខែសីហា ដល់ ៩៧,២តោននៅខែកញ្ញា កន្លងទៅ។
តាមប្រភពដដែល ការនាំចូលមាសរបស់ចិន បានកើតឡើងបីខែជាប់ៗគ្នា។ ទោះបីជាយ៉ាងណា ការទិញមាសទុកមិនមែនជារឿងអាក្រក់នោះទេចំពោះសេដ្ឋកិច្ចរបស់ចិន។ ជាធម្មតាតម្លៃមាសតែងកើនឡើង នៅពេលដែលធនាគារកណ្ដាលបន្ធូរបន្ថយគោលនយោបាយរូបិយវត្ថុ។
ជាការកត់សម្គាល់ តម្រូវការមាសតែងតែកើនឡើងដល់កម្រិតខ្ពស់បំផុត ក្នុងរយៈពេលប៉ុន្មានខែ មុនចូលឆ្នាំចិន។ នេះជាបច្ច័យមិនល្អចំពោះទីផ្សារភាគហ៊ុន។
សូមបញ្ជាក់ថា តម្លៃមាសមានការប្រែប្រួលក្នុងចន្លោះពី ១១០០ ដល់១២០០ដុល្លារក្នុងមួយអោន។
ដោយ៖ រតនៈវិភូ
ប្រភព៖ Reuters និង Business Insider
