វិធីសាស្ត្រដែលគ្រូបង្រៀនក្នុងថ្នាក់មិនត្រូវនឹងអ្នក មិនមែនមានន័យអ្វីៗគឺចប់ហើយនោះទេ
គ្រប់គ្នាតែងតែចង់បានចម្លើយថា តើពួកគេគួររៀនបែបណាទើបរៀនឆាប់ចេះ ចងចាំបានយូរ ឬនិយាយឲ្យចំគឺមានប្រសិទ្ធភាព។ យើងម្នាក់ៗតែងតែចង់បានចម្លើយនេះពីមនុស្សពូកែ ដែលភស្តុតាងពីលទ្ធផលល្អដែលពួកគេទទួលបាន ធ្វើឲ្យយើងជឿទុកចិត្តថាបើបានដឹងថាពីរបៀបដែលពួកគេរៀន នោះអ្នកនឹងអាចរៀនពូកែដូចពួកគេដែរមិនខាន។ តាមពិតទៅ មានមនុស្សតែម្នាក់គត់ដែលអ្នកត្រូវទៅរកចម្លើយទៅកាន់សំណួរនេះមុនអ្នកណាៗទាំងអស់ ដែលនោះគឺគ្មាននរណាក្រៅពីខ្លួនឯងនោះឡើយ។
ការពិតមួយដែលអ្នកត្រូវតែចងចាំជានិច្ចនោះគឺ ខួរក្បាលអ្នកនិងខួរក្បាលមិត្តភ័ក្ដិរបស់អ្នកគឺមិនដូចគ្នានោះឡើយ ហើយក៏មិនដូចគ្នាជាមួយខួរក្បាលមនុស្សជាង៧ពាន់លាននាក់ទៀតដែរ។ ការភ្ជាប់ទំនាក់ទំនងរវាងណឺរ៉ូនមួយទៅណឺរ៉ូនមួយទៀត ដែលគេហៅទំនាក់ទំនងដែលវាភ្ជាប់បាននេះថា ស៊ីណែប ដែលស៊ីណែបនេះហើយគឺជាផ្លូវដែលទិន្នន័យពីខាងក្រៅដែលអ្នកបញ្ជូនមកដោយការរៀនសូត្រជាដើម មានរហូតដល់ទៅរាប់ពាន់លានចំណង។ ដូចនេះ វាមិនអាចទៅរួចនោះឡើយ ដែលការបង្កើតទំនាក់ទំនងរវាងណឺរ៉ូននៅក្នុងខួរក្បាលមនុស្សម្នាក់ៗគឺដូចគ្នាទាំងស្រុងនោះ។
នេះមានន័យថា របៀបដែលខួរក្បាលរបស់មនុស្សម្នាក់ៗទទួលយកទិន្នន័យបញ្ចូលមកទុកក្នុងការចងចាំក៏មិនដូចគ្នាដែរ។ វាគឺជាហេតុផលដ៏សំខាន់បំផុត ដែលអ្នកគួរសួរខ្លួនឯងថាតើរៀនបែបណាទើបឆាប់ចេះនិងមានប្រសិទ្ធភាពនោះ។ មនុស្សខ្លះត្រូវការគ្រូឬមិត្តភ័ក្ដិជួយប្រាប់និងពន្យល់ណែនាំផ្លូវ ទើបពួកគេឲ្យដើរខ្លួនឯងទៅមុខបានជាក្រោយ។ ដោយឡែកអ្នកខ្លះវិញ ទាល់តែអង្គុយស្រាវជ្រាវរៀនសូត្រដោយខ្លួនឯងទើបពួកគេរៀនចេះនិងយល់ស៊ីជម្រៅបាន។ នៅពេលមេរៀនដដែលនេះត្រូវបានអ្នកដទៃពន្យល់ណែនាំប្រាប់ពួកគេ ពួកគេបែរជាយល់ថាធុញទ្រាន់ ច្របូកច្របល់ ភ័ន្តច្រឡំរញ៉េរញ៉ៃទៅវិញ និងមានតែធ្វើឲ្យការរៀនសូត្ររបស់ពួកគេកាន់តែយឺតយ៉ាវជាងមុនទៅទៀត។
យ៉ាងណាមិញ បើអ្នកមិនអាចស្វែងយល់ពីចំណុចនេះដោយខ្លួនឯងទេ ដូច្នេះអ្នកគួរស្វែងរកដំបូន្មានពីអ្នកជុំវិញខ្លួនពីវិធីសាស្ត្រក្នុងការរៀនរបស់ពួកគេហើយ។ ប៉ុន្តែបើវិធីសាស្ត្រនោះមិនមានប្រសិទ្ធភាពសម្រាប់អ្នក អ្នកក៏ត្រូវផ្លាស់ប្ដូរវាចេញទៅ។ ដើម្បីទៅឲ្យដល់គោលដៅមួយ មិនមែនមានតែផ្លូវដើរមួយនោះឡើយ។ ដូចគ្នាដែរ វិធីសាស្ត្រមានច្រើនរាប់មិនអស់ ដូច្នេះអ្នកមិនគួរបោះបង់ចោលនោះឡើយ នៅពេលវិធីសាស្ត្រណាមួយមិនត្រូវអ្នក។
ត្រង់ចំណុចនេះក៏ចង់បញ្ជាក់ដែរថា បើអ្នករៀនមិនចេះមេរៀននៅក្នុងថ្នាក់ដែលគ្រូបង្រៀនទេនោះ នោះក៏មិនមែនមានន័យថាអ្វីៗគឺបញ្ចប់នៅត្រង់នេះដែរ។ នេះគឺជាមូលហេតុដែលបច្ចេកវិទ្យាទំនើបបានបង្កើតឡើងមកដើម្បីផ្ដល់ប្រយោជន៍ច្រើនលើសលប់សម្រាប់អ្នកដែលចេះប្រើប្រាស់វាបានត្រឹមត្រូវ។ នៅក្នុងអ៊ីនធឺណិត មានការបង្រៀនតាមអនឡាញជាច្រើនដែលអមជាមួយនឹងរូបភាពដ៏គួរឲ្យចាប់អារម្មណ៍និងពោរពេញដោយភាពច្នៃប្រឌិត ថែមទាំងមានការពិសោធន៍ជាក់ស្ដែងដែលនៅក្នុងសាលាអ្នកអាចខ្វះខាតឧបករណ៍ពិសោធន៍ទាំងនោះ ទើបបង្កជាការលំបាកសម្រាប់អ្នកដែលត្រូវស្រមើស្រមៃទៅតាមតែទ្រឹស្ដីដែលគេថា ដោយខ្វះនូវការមើលឃើញជាក់ស្ដែង។
មនុស្សយើងនឹងឆាប់ចងចាំនូវទិន្នន័យអ្វីមួយ នៅពេលទិន្នន័យនោះមាននូវអ្វីដែលអូសទាញចំណាប់អារម្មណ៍ពួកគេ។ ចុងក្រោយអ្នកត្រូវចាំថា មនុស្សគ្រប់គ្នាសុទ្ធតែអាចក្លាយជាមនុស្សអស្ចារ្យ នៅពេលពួកគេរៀនតាមវិធីសាស្ត្រដែលត្រឹមត្រូវសម្រាប់ខ្លួនឯង៕
ដោយ៖ ស្រីពៅ
