ចំណុចសំខាន់ៗ បញ្ជាក់ថាវាដល់ពេលអ្នកគួរឆ្លៀតពេលសម្រាកលំហែកាយខ្លះហើយ កុំឲ្យប៉ះពាល់ដល់សុខភាពផ្លូវកាយ និង ផ្លូវចិត្តខ្លាំង!
បើមានជួបនូវបញ្ហាសំខាន់ៗខាងក្រោមនេះ សូមឆ្លៀតពេលដើម្បីសម្រាកខ្លះ និង មិនគួរព្យាយាមបន្តធ្វើការទៀតនោះទេ ដើម្បីកុំឲ្យមានផលអវិជ្ជមានកាន់តែធ្ងន់ធ្ងរ៖
១) តែងតែបង្កើតកំហុសញឹកញាប់៖ នៅពេលអ្នកតែងមានកំហុសជាញឹកញាប់ លើកិច្ចការដែលខ្លួនកំពុងធ្វើនោះ សូមកុំទាន់ព្យាយាមបន្តទៀត ប៉ុន្តែមិនមែនមានន័យថា ត្រូវបោះបង់នោះទេ ពោលគឺអ្នកត្រូវឆ្លៀតពេលដើម្បីសម្រាកបន្តិច ដើម្បីលំហែខួរក្បាល និង គិតឡើងវិញអំពីវិធីដើម្បីដោះស្រាយបញ្ហាទាំងនោះ។
២) ឆាប់ខឹងញឹកញាប់៖ បើអ្នកតែងតែមានអារម្មណ៍មួម៉ៅ និង ឆាប់ខឹងញឹកញាប់នោះ វាបញ្ជាក់ថា អ្នកកំពុងមានអារម្មណ៍ស្មុកស្មាញខ្លាំងណាស់ក្នុងចិត្តជាហេតុនាំឲ្យឆាប់ប្រតិកម្មខ្លាំង នៅពេលជួបអ្វីដែលផ្ទុយពីខ្លួនបន្តិច។ ដូច្នេះបើបើមានសភាពបែបនេះ គួរតែដល់ពេលដែលត្រូវឆ្លៀតពេលសម្រាកលម្ហែកាយខ្លះហើយ។
៣) អ្នកតែងមានអារម្មណ៍ហត់នឿយខ្លាំង៖ បើមានអារម្មណ៍ថា ហត់នឿយខ្លាំងក្នុងខ្លួន ដោយមិនសូវមានកម្លាំងធ្វើកិច្ចការអ្វីទេនោះ អ្នកមិនគួរបង្ខំខ្លួនឯងពេកនោះទេ ព្រោះវាអាចប៉ះពាល់ដល់សុខភាពធ្ងន់ធ្ងរ ទាំងបច្ចុប្បន្ន និង អនាគត។
៤) អារម្មណ៍មិនមូល៖ បើអ្នកមិនមានអារម្មណ៍មូល ឬ មិនអាចផ្ដោតអារម្មណ៍ធ្វើអ្វីមួយបានទេ សូមកុំព្យាយាមធ្វើវាបន្តទៀត ព្រោះខំយ៉ាងណាក៏គ្មានលទ្ធផលល្អដែរ ដូច្នេះគួរតែលៃលកដើម្បីសម្រាកខ្លះ ដើម្បីប្រមូលអារម្មណ៍មិនវិញ៕
ដោយ៖ រតនា វិចិត្រ
