អ្នកជំនាញ៖ អនុវត្តគន្លឹះទាំង៥នេះ ដើម្បីកុំឲ្យកើតជំងឺមហារីកនៅរយៈពេល២០ឆ្នាំក្រោយ
ជំងឺមហារីកជាជំងឺដ៏កាចសាហាវមួយ ក្នុងចំណោមប្រភេទជំងឺផ្សេងៗទៀត ដែលឆក់យកជីវិតមនុស្សយ៉ាងងាយបំផុត។ ជុំវិញបញ្ហានេះដែរ លោក William Nelson ជានាយកមជ្ឈមណ្ឌលមហារីក Sidney Kimmel នៅសាកលវិទ្យាល័យ Johns Hopkinsរបស់សហរដ្ឋអាមេរិកបាន ផ្ដល់អនុសាសន៍ចំនួន៥យ៉ាង ដើម្បីបញ្ចៀសជម្ងឺមហារីកនៅរយៈពេល២០ឆ្នាំក្រោយ៖
១) អ្វីដែលសំខាន់នោះ គឺអ្នកត្រូវតែជៀសវាងការប្រើប្រាស់ថ្នាំជក់គ្រប់ទម្រង់ទាំងអស់។ ជំងឺមហារីកសួត ជាជំងឺដ៏កាចសាហាវមួយដែលកើតឡើងទាំងបុរស និង ស្ត្រីនៅសហរដ្ឋអាមេរិក ដែលបណ្ដាលមកពីប្រើប្រាស់ថ្នាំជក់។ តាមការស្រាវជ្រាវបង្ហាញថា អ្នកដែលជក់បារី គឺមានអត្រាកើតជម្ងឺមហារីកលើសពីមនុស្សធម្មតាចំនួន២៥ដង។ ថ្នាំជក់មិនត្រឹមតែបង្កជាជំងឺមហារីកសួតនោះទេ វាថែមទាំងអាចបង្កជាមហារីកចំនួន១៨ប្រភេទផ្សេងទៀតផងដែរ។
២) បញ្ចៀសការទទួលកម្ដៅពីព្រះអាទិត្យដែលក្ដៅហួសប្រមាណ។ ថ្វីត្បិតតែ ពន្លឺព្រះអាទិត្យគឺមានសារសំខាន់សម្រាប់សត្វ និង រុក្ខជាតិ ប៉ុន្តែការប្រឈមនឹងកម្ដៅព្រះអាទិត្យដែលក្ដៅហួសប្រមាណពេក វានឹងបង្កទៅជាមហារីកស្បែកនៅពេលខាងមុខ។
៣) គួរតែជួបជាមួយគ្រូពេទ្យជំនាញប្រចាំឆ្នាំ ដើម្បីពិនិត្យសុខភាព។ មនុស្សមួយចំនួន ជាពិសេសអ្នកនៅប្រទេសក្រក្រីគឺមិនសូវទៅពិគ្រោះ និង ត្រួតពិនិត្យសុខភាពជាប្រចាំនោះទេ ជាហេតុនាំឲ្យជំងឺមួយចំនួនបានវិវត្តទៅរកសភាពគ្រោះថ្នាក់ដោយមិនដឹងខ្លួន។ ដូច្នេះហើយ អ្នកគួរតែទៅពិនិត្យឲ្យបានទៀងទាត់ ដើម្បីបញ្ចៀសការកើតជំងឺមហារីកប្រភេទណាមួយ។
៤) ត្រូវមានការរស់នៅល្អ ដើម្បីបញ្ចៀសអត្រានៃការកើតជំងឺមហារីក៖ ការរស់នៅល្អ គឺត្រូវតែរស់នៅដោយ ហូបស្អាត ផឹកស្អាត និង រស់នៅស្អាត ជាពិសេសធ្វើយ៉ាងណារក្សាទម្ងន់ឲ្យសមរម្យ ទើបជាការប្រសើរ។ ដូច្នេះហើយ ការហាត់ប្រាណពិតជាមិនអាចខ្វះបាននោះទេ។
៥) បុរសស្ត្រី ទាំងអស់គួរតែទៅជួបគ្រូពេទ្យដើម្បីពិនិត្យ ថាតើបានចាក់វ៉ាក់សាំងការពារHPV (ដែលបង្កជាជម្ងឺមហារីកច្រើនប្រភេទ) និង ចាក់វ៉ាក់សាំងការពារ HBV (ដែលបង្កជាជម្ងឺមហារីកថ្លើម)ហើយឬនៅ៕
ប្រែសម្រួល៖ រតនា វិចិត្រ ប្រភព៖ www.businessinsider.com
