ទីផ្សារភាគហ៊ុនចិន កំពុងជួបគ្រោះធំរាលដាលដល់បណ្ដាប្រទេសមួយចំនួននៅអាស៊ី
ទីផ្សារភាគហ៊ុនចិនកំពុងជួបគ្រោះធំ ពោលគឺស្ថិតនៅក្នុងស្ថានភាពដួលរលំតែម្ដងនាពេលបច្ចុប្បន្នស្របពេលសន្ទស្សន៍ទីផ្សារ Shanghai Composite បានធ្លាក់ចុះ ៣០%ក្នុងរយៈពេលតែប៉ុន្មានពីរបីសប្ដាហ៍នេះប៉ុណ្ណោះ។
បញ្ហានេះ កំពុងតែចាប់ផ្ដើមរាលដាលដល់ទីផ្សារភាគហ៊ុននៅបណ្ដាប្រទេសក្នុងទ្វីបអាស៊ីមួយចំនួន និងទីផ្សារវត្ថុធាតុដើមសកល។ យោងតាមការចុះផ្សាយរបស់គេហទំព័រ Business Insider មូលហេតុសំខាន់នៃបញ្ហានេះ គឺប្រជាជនចិនរាប់លាននាក់បានចាក់សាច់ប្រាក់ជាប់បំណុលទៅក្នុងទីផ្សារភាគហ៊ុនដែលធ្វើឱ្យតម្លៃធ្លាក់ចុះ ស្ថិតនៅក្នុងកម្រិតអស្ថិរភាព។ ជាឧទាហរណ៍ងាយយល់គឺថា នៅពេលតម្លៃភាគហ៊ុនធ្លាក់ចុះ អ្នកវិនិយោគមួយចំនួនបង្ខំចិត្តលក់ភាគហ៊ុនដើម្បីទូទាត់បំណុលដែលខ្ចីទិញភាគហ៊ុន និងដើម្បីទូទាត់ការខាតបង់។ ប្រការនេះនឹងធ្វើឱ្យមានបញ្ហាចលាចលនៅក្នុងទីផ្សារ ដែលជំរុញឱ្យតម្លៃភាគហ៊ុនបន្តធ្លាក់ថ្លៃ។
តាមទិន្នន័យគឺមានប្រជាជនចិនប្រមាណ ៩០លាននាក់ជាអ្នកវិនិយោគក្នុងវិស័យនេះពោលគឺស្មើនឹង ៨០%នៃអ្នកវិនិយោគក្នុងទីផ្សារភាគហ៊ុនសរុប។ តាមសេចក្តីរាយការណ៍របស់ Bloomberg ចំនួនអ្នកវិនិយោគទីផ្សារភាគហ៊ុននៅចិនគឺច្រើនជាងសមាជិកបក្សកុម្មុយនីស្តចិនទៅទៀត៕ ដោយ៖ រតនៈវិភូ
