តម្លៃប្រេងអាចធ្លាក់ចុះដល់២០ដុល្លារ/បារ៉ែល ឆ្នាំនេះដោយសារអារ៉ាប៊ីសាអូឌីតកំពុងលេងហ្គេម
តម្លៃប្រេងបានធ្លាក់ចុះជាង ៧០%ចាប់តាំងពីរដូវក្ដៅឆ្នាំ២០១៤មក។ រហូតមកដល់ពេលនេះ តម្លៃប្រេងនៅខ្ទង់ ២៦ដុល្លារក្នុងមួយបារ៉ែល។
ដោយឡែក បើតាមការវិភាគរបស់ប្រធានសេដ្ឋវិទូក្រុមហ៊ុន IHS Insight លោកបណ្ឌិត Nariman Behravesh ដែលកំពុងតាមដានក្រុមសេដ្ឋវិទូជាង ៤០០បានឱ្យដឹងថា តម្លៃប្រេងនឹងកាន់តែធ្លាក់នៅពេលខាងមុខទៀតនេះ។
លោកបានថ្លែងនៅក្នុងបទសម្ភាសន៍ជាមួយសារព័ត៌មាន Business Insider ក្នុងពេលចូលរួមវេទិកាសេដ្ឋកិច្ចពិភពលោកនៅទីក្រុង Davos ថា ៖«វាអាចទៅរួចទេដែលតម្លៃប្រេងនឹងធ្លាក់ចុះដល់ ២០ដុល្លារក្នុងមួយបារ៉ែលនៅឆ្នាំ២០១៦? បាទ ខ្ញុំថានឹងធ្លាក់ចុះដល់តម្លៃនេះ»។ លោកបន្តថា ៖«តម្លៃប្រេងនឹងធ្លាក់ចុះដល់តម្លៃ ២០ដុល្លារនៅឆ្នាំនេះ។ ប្រសិនបើកើតមានមែន គឺគ្រាន់តែក្នុងមួយរយៈពេលខ្លីប៉ុណ្ណោះ ព្រោះថា បណ្ដាអ្នកផលិតប្រេងនឹងមិនចំណេញ ហើយនឹងឈប់ផលិតវិញ»។
បញ្ហាសំខាន់នៅក្នុងរឿងនេះ គឺបណ្ដាមកពីប្រទេសអារ៉ាប៊ីសាអ៊ូឌីតដែលកំពុងតែសម្លាប់សេដ្ឋកិច្ចខ្លួនឯង (ប្រទេសនេះផលិតប្រេងច្រើនពេកដែលអាចធ្វើឱ្យតម្លៃផ្លាស់ប្ដូរ)។ អារ៉ាប៊ីសាអ៊ូឌីតកំពុងជួបបញ្ហាឱនភាពថវិកាគឺប្រមាណ ៩៨ពាន់លានដុល្លារនៅឆ្នាំ២០១៥ ដោយសារតែការចំណាយច្រើនជាងចំណូលស្របពេលតម្លៃប្រេងធ្លាក់ចុះខ្លាំង៕ ដោយ៖ រតនៈវិភូ
