៣ចំណុចសំខាន់ៗ ដែលមនុស្សវ័យខ្ទង់២០ឆ្នាំ ត្រូវយល់ដឹងអំពីការចំណាយ និង ការសន្សំលុយ
វ័យខ្ទង់២០ឆ្នាំ ជាមនុស្សដែលមិនមែនក្មេងទៀតនោះទេ ថ្វីត្បិតតែចិត្តគំនិតនៅមិនទាន់ចាស់ទុំនៅឡើយក្ដី។ ស្ថិតក្នុងវ័យនេះ បើអ្នកចេះរៀបចំជីវិតឲ្យបានល្អ នោះអនាគតរបស់អ្នកនឹងភ្លឺស្វាងមិនខាន ជាពិសេសទាក់ទងនឹងការចាយវាយ និង សន្សំលុយកាក់។ ខាងក្រោមនេះ ជាចំណុចសំខាន់ៗ ដែលមនុស្សវ័យខ្ទង់២០ឆ្នាំ ត្រូវយល់ដឹង៖
១) ត្រូវរៀនសន្សំលុយ ឲ្យក្លាយជាទម្លាប់៖ វ័យខ្ទង់២០ឆ្នាំ ជាវ័យដែលត្រូវការភាពសប្បាយរីករាយច្រើន ហើយមិនសូវចេះគិតសន្សំលុយកាក់អ្វីនោះទេ ពោលគឺមានប៉ុន្មានសឹងតែចាយប៉ុណ្ណោះឬ ខ្ចីគេចាយបន្ថែមទៀតក៏មាន។ ដូច្នេះហើយ បើអ្នកមិនបង្វឹកខ្លួនឲ្យឲ្យចេះសន្សំលុយនោះទេ ទោះលុយប៉ុន្មានក៏មិនចេះសល់ដែរ។ អ្នកត្រូវចេះរៀនសន្សំ ហើយធ្វើវាជារៀងរាល់ថ្ងៃ ដើម្បីក្លាយជាទម្លាប់ល្អមួយ។
២) ត្រូវតែចេះរកខ្លះ មុនពេលចាយលុយ៖ បើអ្នកនៅតែពឹងលើឪពុកម្ដាយនោះ អ្នកពិតជាគ្មានថ្ងៃយល់ច្បាស់អំពីការលំបាកនៃការរកលុយនោះទេ ដូច្នេះហើយគួរតែចេញមុខរកលុយខ្លួនឯងខ្លះហើយ ដើម្បីដឹងច្បាស់អំពីរសជាតិជីវិត ហើយដល់ពេលនោះអ្នកនឹងមិនហ៊ានចាយវាយខ្ជះខ្ជាយទៀតឡើយ។
៣) កាត់បន្ថយការចំណាយរាល់វត្ថុដែលមិនចាំបាច់៖ អ្នកត្រូវដឹងច្បាស់ថា វត្ថុណាខ្លះដែលមានប្រយោជន៍ខ្លាំងសម្រាប់ការរស់នៅរបស់អ្នក ហើយវត្ថុណាខ្លះដែលមិនសូវសំខាន់។ នៅពេលដឹងច្បាស់ហើយ អ្នកគួរតែទិញតែអ្វីដែលចាំបាច់ និង កាត់បន្ថយ ឬ មិនទិញអ្វីដែលមិនសូវចាំបាច់នោះទេ ព្រោះទិញគ្រប់យ៉ាងនោះ អ្នកគ្មានថ្ងៃអាចសន្សំលុយបានឡើយ៕
ដោយ៖ រតនា វិចិត្រ
