ចិនបង្ហាញពីក្ដីបារម្ភ ជុំវិញគម្រោងសាកល្បងមីស៊ីលរបស់កូរ៉េខាងជើង ខណៈជប៉ុនត្រៀមបាញ់ទម្លាក់
ចិនដែលជាមិត្តស្និតជាមួយកូរ៉េខាងជើង កាលពីថ្ងៃពុធក៏បានបង្ហាញពីក្ដីបារម្ភរបស់ខ្លួន ជុំវិញគម្រោងបាញ់សាកល្បងមីស៊ីលរបស់រដ្ឋាភិបាលទីក្រុងព្យុងយ៉ាងនៅពេលមុខ។
ការបង្ហាញក្ដីបារម្ភនេះ គឺធ្វើឡើងក្រោយពេលដែល ប្រទេសកូរ៉េខាងជើងកាលពីថ្ងៃអង្គារបានប្រកាសប្រាប់ពិភពលោកថា ខ្លួនគ្រោងនឹងបាញ់សាកល្បងមីស៊ីលរបស់ខ្លួន នៅចន្លោះថ្ងៃទី៨ ដល់ថ្ងៃទី២៥ ខែកុម្ភៈខាងមុខនេះ។
សហរដ្ឋអាមេរិក កូរ៉េខាងត្បូង និង ជប៉ុន ក៏ដូចជាបណ្ដាប្រទេសមួយចំនួនទៀតសុទ្ធតែបង្ហាញការមិនគាំទ្រចំពោះគម្រោងសាកល្បងរបស់កូរ៉េខាងជើង។ ក្នុងនោះដែរ ប្រទេសជប៉ុនបានប្រកាសថា ខ្លួននឹងបាញ់ទម្លាក់មីស៊ីលណាក៏ដោយ ឲ្យតែហោះចូលក្នុងដែនអធិបតេយ្យភាពរបស់ខ្លួន។
គម្រោងបាញ់សាកល្បងមីស៊ីលរបស់កូរ៉េខាងជើងនេះ គឺត្រូវបានគេមើលឃើញថា កាន់តែធ្វើឲ្យទំនាក់ទំនងរវាងក្រុងប៉េកាំង និង ក្រុងព្យុងយ៉ាងមានភាពរកាំរកូសជាមួយគ្នាកាន់តែខ្លាំងឡើង។
សូមបញ្ជាក់ថា ប្រទេសចិនជា មិត្តដ៏សំខាន់មួយរបស់កូរ៉េខាងជើង ព្រោះថាប្រទេសឯកោមួយនេះ មិនមានទំនាក់ទំនងច្រើនជាមួយប្រទេសផ្សេងៗក្នុងពិភពលោកនោះទេ៕
ដោយ៖ អ៊ុន ភក្តី
