ជនស៊ីវិលជិត៥០នាក់ស្លាប់ ដោយសារមីស៊ីលវាយប្រហារចំមណ្ឌលសុខភាព និងសាលារៀននៅស៊ីរី
មានជនស៊ីវិលប្រហែល ៥០នាក់ត្រូវបានសម្លាប់បន្ទាប់ពីមីស៊ីលបានវាយប្រហារផ្ទួនៗទៅលើមណ្ឌលសុខភាពចំនួន ៥ និងសាលារៀនចំនួន ២កន្លែងនៅទីក្រុងរបស់ប្រទេសស៊ីរីដែលកាន់កាប់ដោយក្រុមពួកឧទ្ទាមកាលពីថ្ងៃចន្ទ ម្សិលមិញ។ នេះបើតាមការលើកឡើងរបស់ភ្នាក់ងារអង្គការសហប្រជាជាតិ។
ការវាយប្រហារនេះគឺធ្វើឡើងដោយកងកម្លាំងស៊ីរីដែលគាំទ្រដោយរុស្ស៊ី បានវាយប្រហារសន្ធប់ទៅកាន់តំបន់កាន់កាប់ធំមួយគឺទីក្រុង Aleppo ក្នុងបំណងដណ្ដើមក្រុងនេះមកវិញ។
អគ្គលេខាធិការអង្គការសហប្រជាជាតិលោក Ban Ki-moon បានថ្លែងថា ការវាយប្រហារដែលសម្លាប់ជនស៊ីវិលជិត ៥០នាក់គឺជាការរំលោភធ្ងន់ធ្ងរទៅលើច្បាប់អន្តរជាតិ។ អង្គការសហប្រជាជាតិក៏បានថ្កោលទោសដល់ការទម្លាក់គ្រាប់បែកយ៉ាងខ្លាំងក្លានៅភាគខាងជើងប្រទេសស៊ីរី៕
