ផ្ទៃដីដាំដំណាំរួមផ្សំ និង ដំណាំឧស្សាហ៍កម្មរដូវប្រាំង គិតត្រឹមថ្ងៃទី១០ កុម្ភៈ កើនជាងឆ្នាំមុន៦៨០៤ហិកតារ
ផ្ទៃដីដាំដំណាំរួមផ្សំ និង ដំណាំឧស្សាហ៍កម្មរដូវប្រាំងឆ្នាំ២០១៥-២០១៦ អនុវត្តបានចំនួន៧៦ ៤១៤ហិកតារ លើសពីឆ្នាំមុនដល់ទៅ៦៨០៤ហិកតារ។ នេះបើយោងតាមរបាយការណ៍របស់ កសិកម្មរុក្ខប្រមាញ់ និងនេសាទស្ដីពីល្បឿននៃការងារបង្កបង្កើនផលស្រូវរដូវប្រាំងឆ្នាំ ២០១៥-២០១៦ គិតត្រឹមថ្ងៃទី១០ ខែកុម្ភៈ សប្ដាហ៍មុន។
ការអនុវត្តន៍ផ្ទៃដីដាំដំណាំរួមផ្សំ និង ដំណាំឧស្សាហ៍កម្មរដូវប្រាំងគិតមកដល់បច្ចុប្បន្ននេះ គឺលើសពីផែនការដែលបានកំណត់របស់ក្រសួង ដែលការកំណត់ត្រឹមនោះគឺត្រឹម ៤២ ៦៩៨ ហិកតារប៉ុណ្ណោះ។
បើយោងតាមការសន្និដ្ឋានជារួម ក្នុងរបាយការណ៍ដដែលបញ្ជាក់បន្ថែមថា ល្បឿននៃការងារបង្កបង្កើនផលស្រូវរដូវប្រាំងទទួលបានលទ្ធផលល្អប្រសើរ ជាពិសេសដំណាំស្រូវសម្រេចបាន១១៥,៩៦ភាគរយ ហើយក៏ជិតបញ្ចប់ការដាំដុះដែរ។ ទន្ទឹមនឹងនេះប្រជាកសិករបាន និង កំពុងមមាញឹកដំណើរការច្រូតកាត់ និងឱ្យទាន់ពេលវេលាប្រមូលផល៕
ដោយ៖ អ៊ុន ភក្តី
