អាកាសធាតុកម្ពុជា នឹងក្ដៅហួតហែងខ្លាំង ជាមួយបញ្ហារន្ទះ ខ្យល់កន្ត្រាក់នៅខែមិនា និងមេសា
ប្រទេសកម្ពុជា នឹងប្រឈមបញ្ហាអាកាសធាតុ ក្ដៅហួតហែងខ្លាំង នៅខែមិនា និង ខែមេសា ដោយមានបរិមាណទឹកភ្លៀងកក់ខែមានចំនួនតិចតួច ជាពិសេសនោះមានបាតុភូតផ្គរ រន្ទះ ខ្យល់កន្ត្រាក់ នឹងកើតឡើងច្រើនផងដែរ។ នេះបើយោងតាមសេចក្ដីប្រកាសរបស់ក្រសួងធនធានទឹក និងឧតុនិយមកាលពីម្សិលមិញ។
ក្នុងសេចក្ដីប្រកាសនោះបញ្ជាក់ថា ដើមរដូវវស្សា នឹងចាប់ផ្ដើមចាប់ពីខែឧសភា ដល់ខែកក្កដា មានភ្លៀងតិច មានបាតុភូតផ្គរ រន្ទះ និង ខ្យល់កន្ត្រាក់កើតឡើងច្រើន ហើយកូនរដូវប្រាំងនឹងកើតមាន ចាប់ពីពាក់កណ្ដាលខែកក្កដា ដល់ចុងខែកក្កដា។
ចំណែកឯ របាយទឹកភ្លៀងនឹងចាប់ផ្ដើមធ្លាក់ច្រើន ហើយរាយប៉ាយបានល្អ ចាប់ពីពាក់កណ្ដាលរដូវវស្សា រហូតដល់ចុងរដូវវស្សា ពោលគឺ ចាប់ពីខែសីហា ដល់ចុងខែវិច្ឆិកា៕
ដោយ៖ អ៊ុន ភក្តី
