មិនគួរធ្វើរឿងទាំង៤នេះឡើយ នៅពេលអ្នកធ្លាក់ខ្លួនដាច់យ៉ៃ
អ្នកណាក៏ធ្លាប់ជួបបញ្ហាដាច់យ៉ៃ ឬ ស្ទើរអស់លុយពីខ្លួនដែរ ហើយវាជាស្ថានភាពដ៏សែនលំបាកបំផុត។ ក្នុងស្ថានភាពនេះ ប្រសិនបើអ្នកធ្វើរឿងអវិជ្ជមានមួយចំនួន វាមិនត្រឹមតែមិនអាចជួយអ្វីបាននោះទេ វាថែមទាំងបង្កបញ្ហាកាន់តែស្មុគស្មាញថែមទៀត។ ខាងក្រោមនេះ ជារឿងមួយចំនួនដែលអ្នកមិនគួរធ្វើ នៅពេលជិតអស់លុយពីខ្លួន៖
១) កុំខ្ចីលុយគេយកមកចាយសិន៖ រឿងខ្ចីលុយមិនពិបាកនោះទេ ប៉ុន្តែរឿងសងលុយគឺជាបញ្ហា។ ដូច្នេះហើយ ប្រសិនបើមិនចាំបាច់ខ្លាំងទេ សូមកុំទាន់ខ្ចីលុយគេឲ្យសោះ ព្រោះថា អ្នកនឹងរឹតតែជំពាក់គេវ័ណ្ឌកថែមទៀតមិនខាន។ ដូច្នេះគួរចាយវាយតាមស្ថានភាពជាក់ស្ដែងវិញ ទើបជាការប្រសើរ។
២) បញ្ចៀសទម្លាប់បរិភោគអាហារថ្លៃ៖ នៅពេលជួបបញ្ហាហិរញ្ញវត្ថុ សូមអ្នកព្យាយាមកាត់បន្ថយអាហារណាដែលមានតម្លៃថ្លៃដូចមុនឲ្យសោះ ព្រោះពេលនេះមិនដូចពីមុនទេ។ បើអ្នកនៅតែបន្តចំណាយលើអាហារថ្លៃៗទៀត នោះនឹងធ្វើឲ្យអ្នកកាន់តែជួបបញ្ហាកាន់តែខ្លាំងមិនខាន។
៣) កុំឧស្សាហ៍ជួបជុំមិត្តភ័ក្ដិ៖ នៅពេលជួបជុំមិត្តភ័ក្ដិម្តងៗ មនុស្សភាគច្រើនតែងតែបបួលគ្នាបរិភោគអាហារ ឬ ចំណាយលើរបស់របរផ្សេងៗដើម្បីសប្បាយរួមគ្នា។ ដូច្នេះហើយ អ្នកគួរតែព្យាយាមកុំជួបជុំមិត្តនៅពេលកំពុងដាច់លុយ ដើម្បីបញ្ចៀសការចំណាយបន្ថែមទៀត។
៤) កុំប្រើប្រាស់ទឹកភ្លើងច្រើនពេក៖ នៅពេលអ្នកកំពុងខ្សត់ខ្សោយ សូមកុំប្រើប្រាស់ទឹក និង ភ្លើងច្រើនពេក ព្រោះថា វាកាន់តែបន្ថែមការចំណាយរបស់អ្នកកាន់តែខ្លាំង ខណៈពេលអត់លុយស្រាប់ផង៕
ដោយ៖ អ៊ុន ភក្តី
