កូរ៉េខាងជើង គំរាមវាយប្រហារដោយអាវុធនុយក្លេអ៊ែរ ខណៈអាមេរិក និង កូរ៉េខាងត្បូងកំពុងធ្វើសមយុទ្ធយោធា
កូរ៉េខាងជើងបានចេញមុខ ព្រមានថា នឹងប្រើប្រាស់អាវុធនុយក្លេអ៊ែរដើម្បីវាយប្រហារក្នុងន័យការពារខ្លួន សម្រាប់តបទៅនឹងការធ្វើសមយុទ្ធរួមគ្នារវាងកូរ៉េខាងត្បូង និង អាមេរិក ដែលចាប់ផ្ដើមនៅថ្ងៃចន្ទនេះ។
ការព្រមាននេះ ធ្វើឡើងដោយគណៈកម្មាធិការការពារជាតិរបស់កូរ៉េខាងជើង តាមរយៈទីភ្នាក់ងារសារព័ត៌មាន KCNA។
មិនមែនជាលើកទីមួយនោះទេ ដែលកូរ៉េខាងជើងគំរាមវាយប្រហារដោយអាវុធនុយក្លេអ៊ែរ រាល់ពេលដែលសហរដ្ឋអាមេរិក និង កូរ៉េខាងត្បូងបើកសមយុទ្ធនៅក្បែរព្រំដែនរបស់ខ្លួន ដោយរដ្ឋាភិបាលទីក្រុងព្យុងយ៉ាងចាត់ទុកថា ជាអំពើគឃ្លើន និង ប៉ុនប៉ងកម្ទេចប្រទេសរបស់ខ្លួន។
ក្រុមប្រឹក្សាសន្តិសុខនៃអង្គការសហប្រជាជាតិ កាលពីសប្ដាហ៍មុនបានបោះឆ្នោត ដាក់ចេញនូវសេចក្ដីសម្រេចមួយ ដើម្បីដាក់ទណ្ឌកម្មលើប្រទេសកូរ៉េខាងជើងបន្ថែមទៀត ជុំវិញការបាញ់សាកល្បងអាវុធនុយក្លេអ៊ែរនាពេលកន្លងមក៕
ដោយ៖ អ៊ុន រស្មី
