ទោះអាមេរិក និងអ៊ីរ៉ង់មើលមុខគ្នាមិនចំ តែអ៊ីរ៉ង់ប្រកាសស្វាគមន៍ក្រុមហ៊ុន អាមេរិកវិនិយោគវិស័យប្រេង
លោក Bijan Namdar Zanganeh រដ្ឋមន្ត្រីប្រេងរបស់ប្រទេសអ៊ីរ៉ង់ បានប្រកាសកាលពីថ្ងៃអាទិត្យ ម្សិលមិញថា ប្រទេសនេះមិនបានដាក់កំហិតមិនឱ្យក្រុមហ៊ុនអាមេរិកវិនិយោគក្នុងវិស័យប្រេង និងឧស្ម័នរបស់ខ្លួនឡើយ។
លោកបានបន្ថែមទៀតថា ការដាក់កំហិតនៅពេលនេះគឺធ្វើឡើងដោយសហរដ្ឋអាមេរិកទៅវិញនោះទេ។ លោក បានថ្លែងបន្ថែមទៀតថា ក្រសួងប្រេងរបស់អ៊ីរ៉ង់កំពុងចរចាជាមួយក្រុមហ៊ុន Siemens របស់អាល្លឺម៉ង់ និងក្រុមហ៊ុន General Electric ដែលមានមូលដ្ឋាននៅសហរដ្ឋអាមេរិកដល់ការផ្គត់ផ្គង់សម្ភារៈសម្រាប់វិស័យប្រេង និងឧស្ម័នរបស់ខ្លួន។
ការដាក់ទណ្ឌកម្មពីសំណាក់សហគមន៍អន្តរជាតិក្នុងរយៈពេលមួយទសវត្សរ៍ ហើយត្រូវបានដកចេញវិញកាលពីឆ្នាំមុនបន្ទាប់ពីអង្គការសហប្រជាជាតិបានពិនិត្យថា ប្រទេសនេះឈានដល់កិច្ចព្រមព្រៀងបញ្ឈប់កម្មវិធីអាវុធនុយក្លេអ៊ែរ។ សូមបញ្ជាក់ថា នៅពេលសព្វថ្ងៃនេះ អ៊ីរ៉ង់ផលិតប្រេងបានប្រហែល ៤លានបារ៉ែលក្នុងមួយថ្ងៃ៕ ដោយ៖ រតនៈវិភូ
