ហេតុផលទាំង៥យ៉ាងដែលអ្នកគួរតែលើកទឹកចិត្តឲ្យអ្នកដទៃទទួលបានជោគជ័យ
មានមនុស្សជាច្រើនមានភាពត្រេកអរនៅពេលដែលពួកគេឃើញអ្នកដទៃទទួលបានភាពជោគជ័យ ខណៈពេលដែលមានមនុស្សមួយចំនួនទៀតហាក់បីដូចជាមានភាពអាត្មានិយម និង ច្រណែននៅពេលដែលឃើញអ្នកដទៃជោគជ័យ។ ខាងក្រោមនេះគឺជាហេតុផលទាំង៥យ៉ាងដែលគួរតែជំរុញឲ្យអ្នកនៅជុំវិញអ្នកមានភាពជោគជ័យ៖
១) អ្នកអាចធ្វើឲ្យអ្នកដទៃមានអារម្មណ៍ល្អចំពោះអ្នក៖ តើអ្នកមានអារម្មណ៍យ៉ាងណាដែរនៅពេលដែលមានអ្នកដទៃមកជំរុញទឹកចិត្តអ្នក ឲ្យព្យាយាមបំពេញគោលដៅរបស់អ្នក ឲ្យបានសម្រេច? អារម្មណ៍ដែលអ្នកមានមិនខុសពីអារម្មណ៍ដែលអ្នកដទៃមាននោះទេ។ អ្នកនឹងក្លាយជាទីប្រឹក្សារបស់ពួកគេហើយអ្នកទាំងអស់គ្នា នឹងមានការចែករំលែកបែបទូលំទូលាយជាងមុន។
២) អ្នកនឹងក្លាយទៅជាពន្លឺរបស់ពួកគេ៖ មិនថាគោលដៅរបស់មនុស្សយើងធំឬតូចនោះទេ គឺតែងតែជួបឧបសគ្គជានិច្ច ហេតុនេះហើយអ្នកគួរតែព្យាយាមលើកទឹកចិត្តពួកគេនៅពេលដែលពួកគេចង់បោះបង់គោលដៅអ្វីមួយចោល។
៣) ពួកគេនឹងមិនងាយបំភ្លេចអ្នកនោះទេ៖ ជាទូទៅបើសិនជាអ្នកត្រូវការនរណាម្នាក់ចំពេលដែលអ្នកជួបការលំបាក ហើយម្នាក់នោះព្រមជួយអ្នកដោយស្ម័គ្រចិត្ត អ្នកនឹងមិនងាយភ្លេចគុណគេនោះទេ។ ដូច្នេះអ្នកគួរតែព្យាយាមឲ្យអស់ពីសមត្ថភាពនៅពេលដែលនរណាម្នាក់ត្រូវការជំនួយពីអ្នក។
៤) ពួកគេនឹងផ្ដល់អត្ថប្រយោជន៍ឲ្យអ្នកនៅពេលអនាគត៖ ពាក្យថាផលប្រយោជន៍នេះមិនមែនសំដៅទៅលើលុយកាក់តែម្យ៉ាងនោះទេ តែអ្នកអាចទាញផលប្រយោជន៍ពីពួកគេតាមរយៈជាគំនិត ការចែករំលែក និងឱកាសផ្សេងៗជាដើម។
៥) អ្នកនឹងលើកទឹកចិត្តដល់ខ្លួនឯងដោយមិនដឹងខ្លួន៖ នៅពេលដែលអ្នកឃើញអ្នកដទៃទទួលបានភាពជោគជ័យអ្នកក៏ចង់ទទួលបានភាពជោគជ័យដែរដែលនេះជាហេតុដែលធ្វើឲ្យអ្នកមានការខំប្រឹងមួយកម្រិតទៀត។
ប្រែសម្រួល៖ តូច ម៉ាយ៉ារស្មី
ប្រភព៖ www.addicted2success.com
