ប្រលានយន្តហោះនៅបែលហ្សិករងការបំផ្ទុះពីរលើក បណ្ដាលឲ្យមនុស្សជាច្រើនរបួស
ករណីផ្ទុះចំនួនពីរលើកជាប់គ្នា បានកើតឡើងនៅប្រលានយន្តហោះ Zaventem នៅទីក្រុងប្រ៊ុចសែល នៃប្រទេសបែលហ្សិកនៅថ្ងៃអង្គារនេះ ដោយមានសេចក្ដីរាយការណ៍បាននិយាយថា មានមនុស្សមួយចំនួនបានស្លាប់ និង របួស។ នេះបើយោងតាមសារព័ត៌មានNBC។
ចំពោះមូលហេតុនៃការផ្ទុះនេះ មិនត្រូវបានគេបញ្ជាក់ឲ្យបានច្បាស់នោះទេ ប៉ុន្តែ ហេតុការណ៍នេះកើតឡើងបានប៉ុន្មានថ្ងៃប៉ុណ្ណោះ បន្ទាប់ពីអាជ្ញាធររបស់ប្រទេសបែលហ្សិកបានចាប់ខ្លួនក្រុមភេរវជនមួយចំនួនដែលពាក់ព័ន្ធនឹងការវាយប្រហារទីក្រុងប៉ារីស។
ប្រលានយន្តហោះសម្រេចចិត្តបិទបណ្ដោះអាសន្នដើម្បីធ្វើការស៊ើបអង្កេត និងជូនដំណឹងបន្ថែមទៀតនៅពេលក្រោយ។ អាជ្ញាធរក្នុងតំបន់បាននិយាយ ទៅកាន់ប្រព័ន្ធផ្សព្វផ្សាយក្នុងស្រុកថា ជើងហោះហើរទាំងអស់ត្រូវបានផ្អាក។ សូមបញ្ជាក់ថា គិតរហូតមកទល់នឹងពេលនេះ គេមិនទាន់មានរបាយការណ៍អ្នកស្លាប់ និង រងរបួសច្បាស់លាស់នៅឡើយ៕
ដោយ៖ អ៊ឺង មួយយូ
