សម្រាប់អ្នកមានបញ្ហាដំណេក គួរអនុវត្តវិធីសាស្រ្តទាំង១០នេះ នឹងជួយឲ្យឆាប់គេងលក់
មនុស្សជាច្រើនតែងតែចង់គេងឲ្យបានស្កប់ស្កល់ ប៉ុន្តែភាគច្រើនយើងពិបាកក្នុងការគេង។ មនុស្សគ្រប់រូបគួរតែគេងឲ្យបានស្កប់ស្កល់។ហេតុដូច្នេះហើយយើងបានពាំនាំនូវវិធីសាស្រ្តដែលមាន ប្រយោជន៍ដែលអាចជួយអ្នកអាចទទួលដំណេកគ្រប់គ្រាន់។
១) អានសៀវភៅមុនចូលគេង៖ វិធីដ៏ល្អនោះគឺ អ្នកគ្រាន់ទម្រេតខ្លួនលើគ្រែហើយចាប់កាន់សៀវភៅយកមកអានតែប៉ុណ្ណោះ។ ការអានអាចជំនួយដល់ការគេងរបស់អ្នក ព្រោះវាធ្វើឲ្យអ្នកមិនអាចប្រើប្រាស់ឧបករណ៍អេឡិចត្រូនិច ហើយមួយវិញទៀតការអានសៀវភៅអាចធ្វើឲ្យអ្នកគេងលង់លក់ដោយមិនដឹងខ្លួន។ ដូច្នេះលើកក្រោយពេលដែលអ្នកពិបាកគេង អ្នកគ្រាន់តែចាប់កាន់សៀវភៅយកមកអានតែប៉ុណ្ណោះ។
២) កំណត់ពេលវេលាចូលគេងមួយឲ្យជាក់លាក់៖ អ្នកគួរតែកំណត់ពេលចូលគេងមួយឲ្យជាក់លាក់។ ការកំណត់ពេលវេលាចូលគេងអាចជួយឲ្យខួរក្បាលចងចាំពេលវេលាចូលគេង។
៣) ទទួលទានអាហារសម្រាប់សុខភាព៖ គ្រាន់តែទទួលទានអាហារសម្រាប់សុខភាពក៏អាចធ្វើឲ្យអ្នកគេងស្កប់ស្កល់បានដែរ។ យោងទៅតាមការសិក្សាស្រាវជ្រាវមួយបានបង្ហាញថា ការទទួលទានផ្លែឈើ បន្លែនិងគ្រាំធុញ្ញជាតិអាចជួយអ្នកគេងបានយ៉ាងស្រណុកស្រួល ព្រោះវាជួយបង្កើននូវកម្រិត ម៉ាញេសូម ប៉ូតាស្យូមដែលរាងកាយត្រូវការ។
៤) រក្សាសីតុណ្ហភាពក្នុងបន្ទប់ឲ្យត្រជាក់ល្មម៖ ប្រសិនបើអ្នកចង់ចូលគេងឆាប់ អ្នកគួរតែរក្សាសីតុណ្ហភាពក្នុងបន្ទប់ឲ្យត្រជាក់ល្មម។ យោងទៅតាមការពិសោធន៍បែបវិទ្យាសាស្ត្រមួយបានបង្ហាញថា នៅពេលដែលសីតុណ្ហភាពក្នុងរាងកាយធា្លក់ចុះ អ្នកនឹងមានអារម្មណ៍ថាងងុយគេង។
៥) ហាត់យ៉ូហ្គាមុនពេលចូលគេង៖ ការហាត់យ៉ូហ្គាមុនចូលអាចជួយឲ្យរាងកាយរបស់អ្នកសម្រាកនិងជួយឲ្យអ្នកចូលគេងទៅតាមពេលកំណត់។ការហាត់យ៉ូហ្គាជួយកាត់បន្ថយការឈឺចាប់នៃរាងកាយដែលកើតមានឡើងនៅពេលយប់។ប្រសិនបើអ្នកគេងមិនគ្រប់គ្រាន់ អ្នកអាចសាកល្បងហាត់យ៉ូហ្គាមុនចូលគេងនោះអ្នកនឹងមានអារម្មណ៍ថាគេងលក់ស្រួល។
៦) ការសមាធិ៖ ប្រសិនបើអ្នកមានភាពពិបាកក្នុងការគេង ការសម្មាធិអាចធ្វើឲ្យអ្នកមានអារម្មណ៍ស្ងប់និងដកដង្ហើមចេញចូលបានស្រួលដែលជួយសម្រួលដល់ការគេងរបស់អ្នក។
៧) ទទួលទានទឹកដោះគោក្ដៅ៖ ការផឹកទឹកដោះគោក្តៅមិនត្រឹមតែផ្តល់អត្ថប្រយោជន៍ដល់សុខភាពរបស់អ្នកប៉ុណ្ណោះទេ វាថែមទាំងអាចជួយឲ្យអ្នកឆាប់គេងលឿនទៀតផង។
៨) កាត់បន្ថយសារធាតុកាហ្វេអ៊ីន៖ វិធីសាស្រ្តដ៏ល្អបំផុតក្នុងការគេងលក់ស្រួលនោះគឺអ្នកត្រូវកាត់បន្ថយសារធាតុកាហេ្វអ៊ីនដែលភាគច្រើនមាននៅក្នុងទឹកតែ កាហ្វេ និងសូកូឡា។ យោងទៅតាមការសិក្សាមួយបានឲ្យដឹងថាការមិនទទួលទានរបស់ដែលមានផ្ទុកសារធាតុកាហេ្វអ៊ីនក្រោយម៉ោង៣ អាចជំនួយដល់ដំណេកបាន។
៩) បិទឧបករណ៍អេឡិចត្រូនិច៖ អ្នកគួរតែទុកឧបករណ៍អេឡិចត្រូនិចឲ្យនៅឆ្ងាយពីគ្រែគេងរបស់អ្នក នោះអ្នកនឹងមានពេលគេងច្រើន។ យោងទៅតាមការសិក្សាមួយបានឲ្យបង្ហាញថាពន្លឺពណ៌ខៀវដែលចេញពីគ្រឿងអេឡិចត្រូនិកអាចបង្អាក់ដល់ការទទួលដំណេក។ដូច្នេះហើយមុនពេលចូលគេងអ្នកគួរតែបិទកំព្យូទ័រ ទូរស័ព្ទដៃប្រហែលជាមួយម៉ោងមុនពេលចូលគេង។
១០) ដាក់វាំងននការពារពន្លឺពីខាងក្រៅ៖ ការដាក់វាំងននការពារពន្លឺពីខាងក្រៅអាចទប់ស្កាត់ពន្លឺជះចូលមកក្នុងបន្ទប់ ដែលរំខានដល់ការទទួលទានដំណេករបស់អ្នក៕
ប្រែសម្រួល៖ កង លីដា
ប្រភព៖ www.lifehack.org
